Gabaygii: Ka Dhamaystay
...........................................................................................
Faadumo Dhoorre (Faadumo - xabbado) oo u dhaxdey Ismaaciil ayaa beri cidahoodii oo deggan degmada Ceerigaaho soocdaal ku aaddey. Nin Bile Dalmar la odhan jirey
oo ay gabadha qaraabo yihiin ayaa, dabadeed, Ismaaciil waraaq u soo diray uu ku leeyahay: Ismaaciilow, Faadumo indho danbe saari maysid, haddii aadan ii keenin rag shan kun gaadhaya oo ah kuwii Dariiqo (Daraawiish)wax ku bartay oo fardaha sidii u yaqaan. Wuxuu ku daray«Faadumo maanta adigaa u baahane iyadu kuuma baahna».
Ismaaciil kolkaas ayuu yidhi, «Warqadda Bile barbarka uu wax ku soo qoray mooyaane barbarka kale u roga(barbarkii cadaa ayuu tixdan ku qoray Waxuu Yidhi:-

Madi dhiil lahaan jirtey hadday dhawr gu' kugu raagto
Dhasha waxaad u maashaba hadday dhoofka ka caddaato
Dhudhubay nirgaha kula hadhaa dheelmatiinnada e

Dhimataye sartaa laga dhistaa yaan dhurwaa cunine
Ka dhammaystay Faadumo dhal iyo dhuubkii quruxeede
Intuu naaska dhoolka u eg iyo dhabanka nuuraayey

Haddii layga dhaco naagta waw dhiman lahaa ruuxe
Dhaar waxaan ku marayaa inaan geli lahaa dhiige
Miyaansaan u dhaxamoonayaa Dhiiman guursadaye!!